Բժշկությունը անմատչելի է դառնում. բանավեճ

«Գնալով բժշկությունը դառնում է անմատչելի և անհասանելի բնակչության համար»,- այսօրվա ասուլիսի ժամանակ հայտարարեց «Ժառանգություն» կուսակցության ներկայացուցիչ Կարինե Հակոբյան՝ հավելելով, որ օրենքներն էլ ավելի են նպաստում բուժօգնության անմատչելի դառնալուն:

Նման իրավիճակի պատճառն, ըստ Կարինե Հակոբյանի, այն է, որ առողջապահության ոլորտի օրենսդրությամբ զբաղվում են այդ ոլորտում շահեր ունեցող մարդիկ. «Հանձնաժողովի նախագահը չպետք է բժիշկ լինի»,- հայտարարեց նա՝ միաժամանակ նշելով, որ անընդունելի է, երբ մասնավոր հիվանդանոց ունեցող անձն ընդգրկված է օրենսդրության մշակման գործընթացում:

«Ժառանգության» ներկայացուցչին մտահոգել է խորհրդարանում քննարկվող առողջապահական չորս օրինագծերի բովանդակությունը: «Չորս հիմնական օրենքներում անվճար բառի կողքին ավելացել է մեկ բառ՝ «կամ արտոնյալ պայմաններ»»,- հայտարարեց Կարինե Հակոբյանը՝ նշելով, որ անընդունելի է, երբ փոխվում է օրենքը՝ նվազեցնելով անվճար բուժօգնության հնարավորությունը: «Հետզհետե անվճար բուժօգնությունը վերանում է»,- ընդգծեց Հակոբյանը:

«Բժիշկ լինելը թերություն չէ, այլ առավելություն է»,- Կարինե Հակոբյանի հետ չհամաձայնեց ասուլիսի մյուս բանախոս, ԱԺ առողջապահության, մայրության և մանկության հարցերի մշտական հանձնաժողովի նախագահի տեղակալ Մկրտիչ Մինասյանը: Նա ներկայացրեց մայրության ու մանկության բուժօգնությանը հատկացվող պետական հատկացումները:

Ինչ վերաբերում է անվճար բուժօգնության վերացման մասին խոսակցություններին՝ Մինասյանը նշեց. «Նրանք, ովքեր ստանում էին անվճար բուժօգնություն, շարունակելու են ստանալ, իսկ ում բալերը չեն բավականացնում, պետությունը նրանց մասին մտածում է»,- հայտարարեց Մկրտիչ Մինասյանը: Ինչ վերաբերում է օրինագծի հիշյալ փոփոխությանը, Մինասյանը խոստացավ նախաձեռնությամբ հանդես գալ և շտկել այն:

Հարցեր, պատասխաններ, մեկնաբանություններ